Филипче задоволен од сработеното за време на македонското претседавање со здравствената мрежа на ЈИЕ

На денешниот настан симболично го предаваме претседателството на мрежата на Југоисточна Европа на здравствени организации со која ние претседававме изминатиот период (од јули 2018 година досега). Здравствената мрежа ја презема Црна Гора, истакна денеска министерот за здравство Венко Филипче пред почнувањето на 41. Пленарен состанок на здравствената мрежа на Југоисточна Европа за работната сила во здравството во регионот на ЈИЕ, што се одржува во Министерството за надворешни работи.

Посочи дека работеле интензивно на изнаоѓање решенија на најгорливите проблеми пред се во сферата на примарното здравство и одливот на кадри. Во текот на изминатиот период, посочи, го организиравме и националниот форум за здравство на кој присуствуваа и сите земји-членки на мрежата практично земјите од регионот.

– Во таа смисла во интензивна соработка со сите здруженија во земјава, со коморите, со Фондот за здравствено осигурување веќе ги етаблиравме правците во кои сметаме дека треба да одиме за да се зајакне системот на примарна здравствена заштита, рече Филипче.