Ракомет
11. January 2018 - 12:35

ЕП - Хрватска 2018: Македонија дел ракометниот „евро самит“

Машката ракометна репрезентација ќе биде дел на уште едно Европско првенство кое од 12 до 28.јануари ќе со одржува во четири градови во Хрватска. Македонија своите натпревари во рамките на првата фаза ќе ги игра во Загреб, каде за ривали ќе ги има селекциите на: Словенија (13.јануари), Црна Гора (15.јануари) и европскиот првак Германија (17.јануари). 
 
Ова за македонските ракометари е петто учество на „европскиот сами“. Првото учество беше во 1998 година во Италија, кога беше освоено 12-то место. На следниот шампионат на кој настапи Македонија го постигна најдобриот резултат и го освои 5.место во Србија 2012 година. Огромната поддршка од македонските навивачи придонесоа и за позитивните резултати. На шампионатот 2014 година во Данска, нашите ракометари го освоија 10.место, а пред две години во Полска се пласираа на 11.место.
 
Само три репрезентации имаат учество на сите 13 Европски првенства (Хрватска, Шпанија и Франција), Русија остана на 12 учества откако не успеа да избори пласман на ова првенство. Инаку, Хрватска е по вторпат домаќин (првпат беше во 2000 година).
 
Натпреварите ќе се играат во четири града: Загреб (група Ц), Сплит (група А), Пореч (група Б) и Вараждин (група Д). Во втората фаза натпреварите ќе се играат во Загреб и во Вараждин, додека завршницата ќе се игра во „Арена Загреб“. Воедно оваа сала е најголема со капацитет од 15.200 места, „Спаладиум Арена“ во Сплит има капацитет од 10.931 место, „Вараждин Арена“ – 5.200, додека „Жатика Спорт Центар“ во Пореч собира 3.500 гледачи.
Најуспешна селекција на Европските првенства е Шведска со 4 златни медали, додека Франција има еден помалку, а Данска и Германија имаат по две титули и Русија една. Шпанија и Данска имаат најмногу медали – вкупно 6, а Хрватска 5. Шпанија има четири учества во финалните натпревари и нема победа, додека Шведска има скор 4 од 4 на финалните натпревари. На последното финале во Краков Германија ја совлада Шпанија со 24:17.
 
Капитенот на македонската репрезентација Кирил Лазаров е рекордер по бројот на постигнати голови на еден шампионат – 61 на Европското првенство во Србија.
 
Меѓу 12-те судиски двојки, кои ќе судат на ова првенство се наоѓа и македонската која ја сочинуваат Ѓорѓи Начевски и Славе Николов, додека Драган Начевски е „првиот човек“ на судиската организација на шампионатот.
 
Македонија дуелите од првата фаза ќе ги игра во Загреб, а противници се: Словенија (сабота), Црна Гора (понеделник) и Германија (среда).
Натпреварите во А групата ќе се играат во Сплит, а во оваа група ќе играат: Хрватска, Србија, Исланд и Шведска.
Б групата се игра во Пореч, каде се наоѓаат селекциите на: Франција, Норвешка, Белорусија и Австрија.
Во Вараждин се играат натпреварите од Д групата, која ја сочинуваат: Шпанија, Чешка, Данска и Унгарија.
 
Трите првопласирани селекции од секоја група ќе продолжат во следната фаза, со тоа што резултатите од натпреварите со селекциите од истата група се „префрлаат“ во втората фаза. Во втората фаза ќе „вкрстат“ репрезентациите од групите А и Б (ќе играат во Загреб) и од групите Ц и Д (ќе играат во Вараждин). Во следната фаза се играат уште три нови натпревари во групите (1 и 2), а двете првопласирани репрезентации од оваа фаза ќе играат во полуфиналето, а третопласираните од групите 1 и 2 меѓусебе ќе играат натпревар за 5.место. Финалето се игра на 28.јануари во Загреб.
 
Ова е последно Европско првенство со 16 репрезентации бидејќи на следното 2020 година што ќе се игра во Австрија, Норвешка и во Шведска ќе играат 24 репрезентации.