Ели Маказлиева, добитник на наградата „Струшко изгрејсонце“

Традиционалната награда „Струшко изгрејсонце“ која се доделува за книга за деца и млади од македoнски автор, годинава ја доби писателката Ели Маказлиева за книгата „Весели песни со букви лесни“ во издание на „Едука Мак“ од Скопје.

Се работи за едукативна, полезна и поучна книга за буквите од македонската азбука, проследени и збогатени со илустрации од Игор Јовчески.

Поетесата Ели Маказлиева, која со години работи и истражува во литературата за деца и млади, водела доволно грижа за возраста и предзнаењето на читателите, па подготвила песни кои освојуваат со својата едноставност, певливост и ритмичност. Како што и самиот наслов на книгата говори, „Весели песни со букви лесни“ е неопходна сликовница за секое дете, која треба да се најде и во секој наш дом.

Ели Маказлиева е автор на голем број изданија за деца и млади и гласен и одговорен уредник на списанието за најмладите „Смешко“. Нејзина специјалност е воспитанието и образованието на децата и е магистер по педагошки науки. Основач е на Издавачката куќа „Едука Мак“ од Скопје.

Наградата „Струшко изгрејсонце“ ја доделуваат Издавачката куќа „Феникс“ и Фондацијата за културна и научна афирмација и презентација „Македонија презент“ од Скопје. 

Досегашни добитници на наградата се писателите Киро Донев, Панде Манојлов, Петко Шипинкаровски, Добре Тодоровски, Трајче Кацаров и Васил Тоциновски.