Џихадисти од Ал Шабаб нападнаа полициска станица во Кенија

Група вооружени мажи, за кои се претпоставува дека се припадници на милитантната исламистичка група Ал Шабаб, нападнаа полициска станица во југоисточниот дел на Кенија, соопшти полицијата во Најроби.

Инцидентот се случил во приморскиот град Ламу, близу до границата на Кенија со Сомалија.

Здружени сили на кениската војска и полицијата брзо реагирале на нападот, по што се развила неколкучасовна пресметка.

Според полициското соопштение, во судирот биле уништени опремата и системот за комуникациски врски, но нема информации за загинати или повредени при престрелката.

Џихадистите на Ал Шабаб, кои обично брзо реагираат на ваквите настани, прифаќајќи ја одговорноста за нападот, овој пат не се огласија со никакво соопштение.

Безбедносни експерти стравуваат дека инцидентот би можел да биде навестување за поголем напад на џихадистите во пограничниот реон.

Групата Ал Шабаб, која настојува да преземе контрола врз територијата на Сомалија и во Могадишу да прогласи исламистичка држава на темелите на шеријатското право, неколку години е во војна со кениските вооружени сили и полицијата.

Оваа милитантна група ги напаѓа припадниците на кениската војска не само на сомалиска територија, туку и во внатрешноста на Кенија, откако оваа земја го предводи воениот контингент на Африканската Унија против Ал Шабаб.

Припадници на групата извршуваат терористички напади во Сомалија, но и во Кенија.