Државата Њујорк воведе нови ограничувања за купување оружје

Гувернерката на американската сојузна држава Њујорк, Кети Хочул, потпиша пакет од 10 закони за контрола на оружјето, поставувајќи нови ограничувања за неговото купување по масовните престрелки во Бафало и Тексас.

На церемонијата на потпишување таа кажа дека „вака не може да се живее и дека ова е морален момент за жителите на Њујорк, но и за остатокот од нацијата“, пренесуваат британските медиуми.

-Следете го тоа што го направивме во Њујорк и конечно ќе бидеме на почетокот на крајот на ова насилство и масакри што се случуваат секој ден во нашата земја, рече гувернерката на Њујорк.

Таа, исто така, се додава, потпишала друг закон, што го ограничува купувањето на панцири отпорни на куршуми и панцири за службите за спроведување на законот или сродните професии.

Со законот, донесен пред неколку дена, се зголеми старосната граница за купување или поседување полуавтоматска пушка од 18 на 21 година.

Во повеќето места во Њујорк, се уште им беше дозволено на 16-годишници да имаат други видови пушки и сачмарки.

Оваа сојузна држава сега им се придружува на другите, како Флорида, Хаваи, Илиноис, Вермонт и Вашингтон, кои бараат заинтересираните лица да имаат најмалку 21 година за да можат да купат некој вид долго оружје.