Доделени наградите за литературни творби на тема „Струмички карневал“

Градската библиотека „Благоја Јанков-Мучето“ во соработка со Организацискиот одбор на Струмичкиот карневал, ги додели наградите за најдобри литературни творби со тема за карневалот.

Од Библиотеката информираа дека на конкурсот пристигнале 95 творби во три категории: за возрасни автори, за средношколци и за млади творци од основните училишта. Годинава имало и неколку творби од ученици од прво до петто одделение. За наградите одлучија вработени во Библиотеката: Тања Гошева, Аница Милева-Глигорова и Васка Кирова. 

Во категоријата ученици од прво до петто одделение единствена награда и е доделена на Андреа Маказлиева од ООУ „Видое Подгорец” од Струмица.

Во категоријата за основци од петто до деветто одделение, првата награда ја делат тројца ученици: Марија Витанова и Тиме Крстев од ООУ „Видое Подгорец“ од Струмица и Ивана Крстева од ОУ „Гоце Делчев“ од Велјуса. Втора награда во категоријата основци добија:  Ванеса Стојкова од ООУ „Никола Вапцаров“ од Струмица, Александра Стоилова од ООУ „Свети Кирил и Методиј“ од Иловица и Стефан Плавчев од ОУ „Гоце Делчев“ од Велјуса. Третата награда меѓу основците им е доделена на Мирјана Алачева од ООУ „Маршал Тито“ од Муртино и Стефани Стојанова од ООУ „Борис Трајковски“ од Моноспитово.

Во категоријата средношколци првонаградени се: Симона Гошева од СОУ „Никола Карев“ од Струмица, Адријана Димовска и Костадинка Витанова од СОУ „Јане Сандански” од Струмица, а втора награда доби  Јовица Петров од ПСУ „Јахја Кемал” од Струмица. 

Во категоријата возрасни автори, првонаградени се Ирена Стевановска од Крива Паланка и Ице Беличев од Струмица, а втората награда и е доделена на Наташа Цонева-Лазаревска од Струмица. Пофалници им беа доделени на деветмина ментори. 

На фестивалската програма вечер во Домот на културата „Антон Панов“ ќе биде отворена изложба на фотографии „Струмички карневал“, а потоа ќе почне Концерт под маски на ОМУ „Боро Џони“ од  Струмица.