Димитров посетата на Брисел ја заврши со средба со Серафин

Република Македонија претставува голема можност за успех во Европа и заслужи почеток на пристапните преговори со ЕУ, порача денеска во Брисел шефот на македонската дипломатија Никола Димитров на средбата со шефот на кабинетот на Претседателот на Европскиот совет, Доналд Туск, Пиотр Серафин.

Својата тридневна посета на Брисел Димитров ја заокружи со обраќање во бриселскиот тинк-тенк „The Macedonian name dispute: a test case for Balkan enlargement”.

Министерот Димитров ги запозна присутните со состојбата во Република Македонија, соопшти МНР.

Тој ја истакна важноста за изнаоѓање решение на спорот со Грција со што, покрај Република Македонија, придобивки би имале и регионот, но и Европа.

- Преговорите со Грција не се само процес за решавање на разликата што ја имаме, туку и процес кој ќе не направи блиски сојузници, нагласи Димитров.

Тој се осврна и на внатрешните реформи - она што е до сега направено како и она што треба да се направи, со посебен фокус на реформите во судството и слободата на медиумите.

Димитров зборуваше и за добрососедските односи, вклучувајќи го и Договорот за пријателство, добрососедство и соработка помеѓу Република Македонија и Република Бугарија.