Димитров на состанок на министрите за надворешни работи во рамки на Берлински процес

Министерот за надворешни работи, Никола Димитров, во наредните два дена ќе учествува на подготовителниот состанок на шефовите на дипломатиите на земјите учеснички во Берлинскиот процес, кој се одржува во Варшава.

Состанокот е предвиден како подготовка на шестиот Самит на Берлинскиот процес, кој оваа година се ќе одржи на 5-ти јули во Познан, а целта е  осврт на земјите учеснички во Процесот кон она што е постигнато во изминатата година, идентификувајќи ги достигнувањата, предизвиците и можностите за земјите од Западен Балкан.

Во рамки на трите предвидени сесии, министрите за надворешни работи ќе имаат можност да ги споделат своите ставови и искуства во однос на продлабочување на регионалната соработка и решавање на отворените билатерални прашања, проширување на областите на соработка на младите од регионот, со акцент на Регионалната канцеларија за млади (RYCO), како и за очекувањата во поглед на придобивките од Самитот во Познан.

На постојниот формат на земјите од ЗБ6 и земјите-членки на ЕУ кои досега беа дел од Процесот (Германија, Австрија, Франција, Италија, Обединетото Кралство, Полска, Хрватска и Словенија), годинава им се придружуваат и Бугарија и Грција.

По завршување на состанокот, како што соопштија од Министсртвото за надворешни работи, ќе се одржи и Третата министерска конференција на Фондот за Западен Балкан.