Македонија
29. March 2020 - 18:27

Детектор: Четвртина од граѓаните очекуваат крај на корона кризата за еден месец – во наредните недели над една третина очекуваат влошување

Близу половина од анкетираните очекуваат кризата да заврши меѓу еден и три месеци, покажува најновото истражување на јавното мислење кое по нарачка на Детектор го спроведе Институтот за политички истражувања Скопје. Една четвртина се оптимисти и крајот го очекуваат за една недела до месец дена.

Според истражувањето, 28,7% од анкетираните сметаат дека епидемијата ќе престане да се шири за еден до три месеци. 25,1% крајот го очекуваат меѓу една недела и месец дена, додека 12,2% очекуваат кризата да трае од три до шест месеци. 

8,1% се оптимисти и сметаат дека вирусот ќе престане да се шири најмногу за една недела, додека 5,1% стравуваат дека вирусот ќе се шири уште повеќе од 6 месеци.

Над една третина или 37,9% од граѓаните сметаат дека кризата со корона вирусот во наредните неколку недели ќе се влоши, 31,6% очекуваат подобрување, додека според 13,5% нема да има никакви промени.

Истражувањето на јавното мислење за потребите на Детектор го спроведе Институтот за политички истражувања Скопје врз репрезентативен примерок од 1116 испитаници во периодот од 18 до 21 март оваа година.