Денеска попладне во Скопје ќе се одржи Парада на гордоста

Во Скопје денеска попладне ќе се одржи Парадата на гордоста, која ќе започне од фонтаната „Лотус“ во Градскиот парк.

Организаторите посочуваат дека настанот претставува протестен марш за човекови права, еднаквост и достоинствен живот на ЛГБТИК+ заедницата во земјава. Според нив, овогодишната Парада се организира во период на засилени општествени и политички предизвици, испраќајќи пораки за видливост, солидарност и спротивставување на дискриминацијата.

Маршрутата на движење ќе започне од Градскиот парк, продолжувајќи по булеварот „Илинден“, улицата „Франклин Рузвелт“ и булеварот „Партизански одреди“, до крстосницата со улицата „Васил Главинов“. Оттаму учесниците ќе се движат по улицата „Димитрие Чуповски“, а завршницата на настанот е предвидена во паркот „Жена борец“ на улицата „11 Октомври“.

Поради одржувањето на Парадата на гордоста, надлежните најавија воведување на посебен режим на сообраќај на улиците низ кои ќе се движи маршот.