Де Мезиер: Германија не може да ги прими сите бегалци во Европа

Германскиот министер за внатрешни работи Томас де Мезиер повика за утврдување на цврсти квоти за прием на бегалци во Европа и нагласи дека неговата земја не може да ги прими сите бегалци, пренесува ТАСС.

Во однос на бегалската криза, Германија не може да се изолира од другите земји во ЕУ, истакна германскиот министер во интервју за весникот „Шпигел“.

- Ние сепак не можеме ниту да ги примиме сите луѓе, кои бегаат од зоните на конфликт и сите мигранти, кои поради сиромаштија тргнале на пат, истакна Де Мезиер.

Според него правилен пат е да се утврдат во ЕУ цврсти квоти за прием на бегалци, што ќе овозможи на Европа да прими толкав број на бегалци, колку што е во рамки на силата на секоја одделна држава.

- Да се прифатат стотици илјади луѓе, и тоа точно сега, кога се приближува зимата е голем предизвик, истакна Де Мезиер, додавајќи дека ќе биде тешко да се интегрираат на пазарот на трудот, оние што ќе останат во земјата.