Цуклев: За еден месец СДС ги задолжи граѓаните со 60 милиони евра

ВМРО-ДПМНЕ денеска обвини дека СДСМ за еден месец од нивното владеење ги има задолжено граѓаните за 60 милиони евра.

Драган Цуклев од ВМРО-ДПМНЕ изјави дека од овие задолжувања граѓаните досега не виделе ништо и оти не е реализиран ниту еден проект.

- Секој ден изминативе 37 дена Владата на СДС ги задолжуваше граѓаните по 1 милион и 600.000 евра. Резултат во реализирани проекти – нула. Освен задолжување, видовме само деструкција, укинување и блокади. Сметајќи со калкулациите на СДС од пред изборите, Владата на Заев ако продолжи со ова темпо на задолжување, а ќе продолжи, за една година ќе ги задолжи граѓаните околу 720.000.000 евра, а за 4 години мандат граѓаните ќе бидат задолжени околу 2.880.000.000 евра, посочи Цуклев.

Според него, тоа е спротивно од она што го зборувала СДСМ пред изборите. - Од овие 60 милиони евра граѓаните досега не видоа ништо. Минималната плата не е покачена на 16.000 денари како што ветуваше Заев, ниту пак просечната плата се покачи на 30.000 денари. Докторите се уште ги очекуваат ветените 100.000 денари плата, а нема отпочнато ниту 1 километар од новите 500 километри автопат кои СДС ги ветуваа како капитална инвестиција, рече Цуклев.