Чулев: До Владата ќе доставам уредба за награда од по 15 илјади денари за припадниците на МВР

Министерот за внатрешни работи Наќе Чулев денеска на својот фејсбук профил информира дека потпишал и до Владата ќе достави уредба со која се предвидува награда од 15.000 денари линеарно и еднократно за секој од полициски службеници, вработените во управните служби и останатиот административен персонал во Министерството за внатрешни работи, кои, како што вели, целиот овој период неуморно и пожртвувано даваат се од себе во првите редови во справувањето со коронавирусот.

-Немам никаква дилема дека тие со својот труд и ангажман го заслужуваат ова и очекувам Владата на првата наредна седница да ја усвои оваа уредба. Здравјето и животот на вработените се наш исклучителен приоритет и цврсто сме посветени на процесот на вреднување на нивниот придонес во остварување на целите на Министерството за внатрешни работи, напиша Чулев на ФБ.