Честитка од премиерот Груевски по повод Рамазан Бајрам

Премиерот Никола Груевски упати честитка до претседателот на Исламската заедница во Република Македонија Реис Ул Улема Хаџи Сулејман Ефенди Реџепи по повод исламскиот празник Рамазан Бајрам.

- Традициите со кои се идентификуваме и празниците кои ги славиме се тука да не потсетат на вредностите кои го дефинираат нашето постоење и идентитет. Споделувањето на овие моменти со најблиските го зацврстува семејството и ги пренесува верувањата и културата на една заедница на идните генерации. Воедно ваквите големи празници отсекогаш биле прилика за изразување на заемна почит и пријателство помеѓу луѓето од различна вероисповест и служеле за зајакнување на добрите односи кои се стремиме да ги градиме во текот на целиот живот, стои во честитката.

Бајрамските празнувања и пораката за мир, добрина и милост која тие ја носат, додава премиерот, се дел од културното богатство и религиозниот диверзитет кој е препознатлив за нашата држава.

- Овие универзални принципи се столбовите на демократијата, добрососедството и соживотот кои во Македонија отсекогаш сме ги промовирале како најважни. Уверен сум дека наша заедничка вредност и стремеж е одржување на вековното пријателство и разбирање помеѓу нашите заедници, како што тоа било пракса со генерации во минатото. Цел кон која знам дека и во иднината заеднички ќе продолжиме да работиме, наведува Груевски.