Битолските месари и касапи го слават светецот заштитник Свети Архангел Михаил

Битолските месари и касапи денеска го слават светецот заштитник Свети Архангел Михаил.

Според востановената традиција, претпладнево претставници на организацискиот одбор на месарите и касапите од Битола присуствуваа на свечена литургија која што се одржа во црквата Свети Архангел Михаил во населбата „Довлеџик“, а напладне имаат заеднички ручек.

- Денешниот ден за нас месарите и касапите е голем ден и никогаш не го забораваме. На овој празник не фаќаме нож в рака, не сечеме ниту мелеме месо. До пладне ги држиме продавниците за месо отворени, но продаваме тоа што муштеријата ќе го одбере со очи без да сечеме или мелеме месо. Потоа одиме на свечениот ручек каде има поголем број месари и касапи кои уживаат во заедничката дружба, информираа од организацискиот одбор.

На празникот на светецот заштитник Свети Архангел Михаил, месарите и касапите од Битола уште еднаш потсетија дека иако традицијата се одржува, сепак бројот на месари и касапи постојано се намалува иако во овој занает нема ниту еден невработен. Основниот проблем, како што велат е немањето соодветни услови и програми за нивно образование или усовршување, па често се случува месарскиот занает да се одржува само во одредени семејства, од колено на колено.