Битиќи: Ги поддржуваме компаниите да го развиваат своето производство и конкурентноста на странските пазари

Заменик-претседателот на Владата на Република Северна Македонија задолжен за економски прашања Фатмир Битиќи ја посети компанијата ТЕЦУП од Тетово, која се занимава со производство на хартија и картон и која Владата ја поддржува преку законот за финансиска поддршка.

Битиќи рече дека се работи за компанија која работи со квалитативни и биоразградливи материјали, погодни за животната средина.

-Оваа компанијата произведува хартиени чаши за чај, кафе, сок и сладолед за еднократна употреба, производи кои се со квалитативни и биоразградливи материјали наменети за домашниот но и на странскиот пазар, поточно за пазарите во Србија и Италија, изјави Битиќи.

Вицепремиерот информираше дека компанијата ТЕЦУП е поддржана преку Законот за финансиска поддршка на инвестиции, бидејќи се работи за компанија чии производи се во согласност со ISO стандардите во хармонија со Европскиот зелен договор на кој Владата е сериозно посветена.

-Партнерски ќе ја следиме компанијата во нејзината инвестиција во нов објект со вкупна површина од 400 метри квадратни каде што се планирани нови производствени капацитети. Токму ова е и целта на планот за економски раст за поддршка на компаниите, да ги поддржи компаниите како ТЕЦУП, партнерски да ги поддржи, и да ги помогне да инвестираат и да се развиваат, изјави Битиќи.

Шуиб Весели еден од сопствениците на компанијата ТЕЦУП се заблагодари за финансиската поддршка за која рече дека е добредојдена за изградбата на новите производствени капацитети, кои ќе допринесат за додадена вредност на компанијата.