Бесплатен оброк за 1.810 ученици од прво до петто одделение во Кавадарци

Бесплатен оброк е обезбеден за 1.810 ученици од прво до петто одделение во Кавадарци, од страна на општинскиот буџет. За овој проект се обезбедени 19.5 милиони денари за тековната учебна година. 

Директорот на Основното општинско училиште ,,Димката Ангелов - Габерот", Ѓорѓи Ѓорчев денеска потсети дека овој проект започна да се спроведува од крајот на минатата учебна година. 

- Во нашето училиште, 245 ученици секојдневно добиваат здрав оброк, што е значајно за создавање на навики за здрав начин на исхрана од најмала возраст. Голема благодарност до локалната самоуправа и градоначалникот, истакна Ѓорчев. 

Детската насмевка е непроценлива, нагласи градоначалникот на Кавадарци, Митко Јанчев. 

- Проектот „Бесплатен оброк за секое дете’’, кој ги опфаќа учениците од прво до петто одделение во сите основни општински и подрачни училишта,  успешно се имплементира и од почетокот на новата учебна година, кон што и се стремиме како Општина и се реализира, согласно претходно регулираните законски постапки за заштита на безбедноста и здравјето на учениците. Менито е нутриционистички изготвено и вклучува разновидна храна, пијалак и овошје, додаде Јанчев.

Директорката на училиштето „Тоде Хаџи - Тефов", Марија Трајкова информира дека 392 ученика од оваа воспитно образовна установа се дел од проектот за бесплатен оброк на Општината. 

- Менито е истакнато на влезната врата во училиштето. Ние како установа сме организирани за прием, времено чување на оброците и нивна распределба, додаде таа.