Белград со поддршка за Српска листа да биде дел од владата на Харадинај

Директорот на Канцеларијата за Косово и Метохија во Владата на Србија, Марко Ѓуриќ, по средбата со претставниците на Српска листа во Белград, изјави дека ја имаат поддршката на претседателот Александар Вучиќ, Владата и институциите на Србија, да бидат дел од владата на Рамуш Харадинај.

- По консултациите и добиената поддршка за влез во новата косовска извршна власт, гласањето за владата во Парламент се очекува да биде вечерва, по пристигнувањето на пратениците на Српска листа од Белград, објави издание на приштинскиот весник „Експрес“.

Според истиот извор, српскиот претседател Вучиќ, изјави дека не го сменил својот став кон  Харадинај, додавајќи оти одлуката дали ќе бидат дел од владата, Србите ќе ја донесат самите. 

- Одлуката за евентуално учество во владата на Косово може да ја донесат единствено Србите, кои го чуваат постоењето на нивниот народ во Косово, истакна Вучиќ. 

Српска листа се очекува да биде дел од владината коалиција со ПАН (Демократска партија, Алијансата за иднината на Косово и Иницијатива за Косово), Алијансата за Ново Косово и пратениците од немнозинските етнички заедници и ќе добие три министерски места, при што  еден од министерите ќе ја врши и функцијата вице премиер.