Банкротираше фирмата која требаше да произведува електрични автомобили во Тетово

Германската компанија за производство на електрични автомобили„Некст.е.ГО. Мобиле“ (Next.e.GO Mobile SE – „e.GO“), која требаше да гради фабрика и во индустриската зона во Тетово, поднесе барање за стечај во Окружниот суд во Ахен (Германија) со што во неизвесна положба стави 32о вработени. Компанијата ги откажа и двете инвестиции на Балканот, во земјава и во Бугарија.

Компанијата соопшти дека одлуката да поднесе барање за стечај е донесена „наспроти неодамнешните негативни случувања и предизвици“ во индустријата за електрични автомобили и „нестабилноста на пазарите на капитал“.

Ова е второ барање за стечај на компанијата. Првото беше поднесено во 2020 година.

Оваа компанија требаше да инвестира и во тетовската индустриска зона која требаше да биде готова годинава, но минатата недела Дирeкецијата на ТИРЗ соопшти дека го раскинала договорот со инвеститорот и ги активира заштитните механизми во потпишаниот договор, кои ги предвидуваат и овие околности (стечај, ликвидација), како предуслов за запирање на доделување на државна помош.