Авиолинија Скопје – Атина од четврток

На Скопскиот аеродром в четврток (1 ноември) во 18 часот ќе биде одбележано  воспоставувањето на директни летовите помеѓу Скопје и Атина од страна на  грчката  авиокомпанија  „Ејџиан Ерлајнс“ (Aegean Airlines), најави денеска ТАВ Македонија, концесионер на аеродромите во Скопје и воп Охрид.

На настанот се најавени обраќања на министерот за транспорт и врски  Горан Сугарески, директорот за земски операции во Aegean Airlines Панос Николаидис и на  генералниот директор на ТАВ Македонија Алпер Ерсој.

На новата авиолинија, согласно зимскиот ред на летање, ќе се реализираат летови двапати неделно, секој четврток и вторник.

Како што објави претходно МИА според информации од Атина, Скопје и Атина ќе ги поврзе авион на „Олимпик ер“, подружница на „Ејџијан ерлајнс“, а летовите ќе бидат со авион „кју400“ со капацитет од 78 патници.

Авионот секој вторник од Атина ќе тргнува во 9 часот по локално време, а во 9.45 од Скопје по македонско време.

Во четврток летот од грчкиот главен град е во 18.40 часот, а од македонската во 19.25 часот.

Од Скопје до Атина, и обратно, ќе се стигнува за 1 час и 15 минути.

„Ејџиан Ерлајнс“ ја најави линијата во октомври минатата година, а авионското поврзување помеѓу двата града се случува по повеќе од 10 години.  Претходно од 2003 година неколку години постоеше директно авионско поврзување меѓу Скопје и Атина, со редовна линија, пет пати седмично, кое што беше прекинато.