Анкета: Над 60 отсто од Косовците нема да излезат на избори

Речиси две третини од учесниците во анкетата што ја спроведе новинската агенција КосоваПрес изјавиле дека нема да гласаат на вонредните избори што на 6 октомври ќе се одржат во Косово, јави дописникот на МИА од Приштина.

Во онлајн анкетата на агенцијата, со прашање „Дали ќе учествувате на изборите?“, гласале 3.701 лице. Од нив, 2.332 лица, или 63 отсто од анкетираните, изјавиле дека нема да излезат на гласање, 1.216, или 33 отсто, дека ќе гласаат, додека 153, односно 4 отсто, одговориле дека не знаат.

Вонредните избори на 6 октомври годинава ќе се одржат откако премиерот Рамуш Харадинај, на 19 јули, поднесе оставка на функцијата, по што Собранието на Косово, на 22 август, се самораспушти.