Алкалоид одигра нерешено со Сибир, но остана сам на врвот на табелата

Шахистите на Алкалоид одиграа нерешено 3:3 во дуелот од 6.коло со екипата на Сибир во рамките на Европскиот клупски куп. Ова беше прв нерешен резултат за македонскиот шампион по петте победи во првите пет кола. Алкалоид и натаму е лидер со 11 бодови, а следуваат: Медни Всадник, Москва, Сибир и Свети Николај Српски со по 10 бодови.

Сите шест партии на дуелот Алкалоид – Сибир завршија реми по голема борба бидејќи и двете екипи имаат шанси за освојување на првото место.

Вториот македонски тим Гамбит Асеко оствари триумф над Берлин со 5:1 и ја постигна третата победа и со 7 бодови се проби на 22 место.

Во рамките на последното коло што се игра денеска Алкалоид игра против Москва, Медни Всадник за ривал го има тимот на Сибир, а Свети Николај Српски за ривал ја има екипата на Одлар Јурду.

Гамбит Асеко игра против Луг.