Алармантен број алкохоличари во Иран без разлика на забраната

Полицијата во Техеран во претходните 12 месеци уапсила 2.900 возачи во алкохолизирана состојба, изјави денеска висок полициски официјален претставник.

Тој истакна дека „и покрај исламската забрана за конзумирање алкохол, бројот на пијани возачи е алармантен“.

Алкохолот е забранет во Иран од револуцијата во 1979 година, а оние кои го прекршуваат законот можат да бидат парично казнети, приведени или осудени на затворска казна.

Само христијанското малцинство во Иран има право за производство на вино за верски цели.

Зголемената побарувачка за сите видови на алкохолни пијалоци го зголемила и шверцот на алкохол од Ирак и Турција.

Според официјалните податоци, во Иран има 200.000 алкохоличари, додека повеќе од еден милион Иранци редовно конзумираат алкохол.