Акција за чистење на просторот во Клинички центар

Акција за чистење на просторот во комплексот клиники „Мајка Тереза" во Скопје денеска спроведуваат Службата за заеднички и општи работи при Клиничкиот центар и Државниот санитарен и здравствен инспекторат.

Акцијата, како што информираат од Министерството за здравство, се спроведува со поддршка од јавните претпријатија на Град Скопје, „Градски паркинг", „Комунална хигиена", „Паркови и зеленило" и депонијата "Дрисла".

 
Директорката на Заеднички служби Шкодране Дарлишта, информира дека акцијата е почната во 8 часот изутрина и опфатен е просторот меѓу сите клиники, со собирање отпад, миење улици, средување на зеленилото, а се чистат и чекални, ходници и лифтови во клиниките.

Државниот санитарен и здравствен инспекторат врши дезинфекција на депоата каде се собира комунален и медицински отпад.