40-годишна жена со „мерцедес“ усмрти пешак во Волково

Во вечерта на 3 јануари, во скопското село Волково, се случила сериозна сообраќајна несреќа со трагичен крај, при што загинал пешак на возраст од 60 години.

Инцидентот се случил околу 20:55 часот на улицата „100“, кога 40-годишната М.С. од Скопје, управувајќи патнички автомобил „мерцедес“ со скопски таблички, удрила во Г.И. (60) од Волково. Пешакот се здобил со тешки телесни повреди и починал на лице место, а смртта ја потврдил лекар од Итната медицинска помош.

По пријавата, увид на местото на несреќата извршила екипа од СВР Скопје, а возачката била приведена во раните утрински часови, односно во 00:45 часот на 4 јануари 2026 година.

По завршување на целосната постапка и документирање на настанот, против неа ќе биде поднесена кривична пријава по член 300 од Кривичниот законик, за тешки кривични дела против безбедноста во сообраќајот.