Згрижени двајца бездомници во Струмица

Две бездомни лица на возраст од 70 и 56 години од синоќа се згрижени во контејнерите поставени во дворот на Црвениот крст во Струмица, информираа од оваа организација.

– Ние бевме подготвени за прием на бездомници уште пред студениот бран кој ја зафати државата. Двете лица престојуваат во затоплени простории и добиваат топол оброк. Ние имаме капацитет за сместување на осум лица во нашите два контејнери. За разлика од лани, кога нашите услуги ги користеше само еден бездомник, сега имаме двајца. Објектите се подготвени и имаме залихи на храна, информираше Маријана Тошева, секретар на Црвениот крст на Струмица.

Апелира до граѓаните доколку се во можност да донираат топла облека за возрасни машки лица и додава дека граѓаните можат да пријават бездомно лице на телефонските броеви 070 381 660 и 071 345 901.