Земјите членки на СБ на ОН треба да учествуваат на самитот за Кипар во Женева

Земјите  членки на Советот за безбeдност на ОН треба да учествуваат на идната средба на високо ниво во Женева, која ќе има за цел отстранување на клучните пречки пред спогодбата за повторно обединување на Кипар, изјави денеска кипарскиот владин портпарол Никос Христодулидис, цитиран од американските медиуми.

Христодулидис посочи дека земјите членки на СБ на ОН изразиле подготвеност „активно и ефикасно да учествуваат“ на таквата средба на високо ниво и посочи дека тој го очекува нивното учество.

Портпаролот истакна дека Советот за безбедност на ОН треба да ја обезбеди примената на мировниот договор.

Самитот за Кипар, планиран за следниот месец во Женева, е продолжение на конференцијата за Кипар од јануари во Женева, на која учествуваа лидерите на двете заедници на островот, како и министерите за надворешни работи на земјите гаранти на безбедноста на островот - Грција, Турција и Велика Британија.

На самитот следниот месец повторно ќе се разгледа клучното прашање за обезбедување на безбедноста по повторното обединување - прашање кое долго време ги попречува преговорите.

Конференцијата во јануари заврши без постигнување исчекор и надминување на разликите меѓу страните.

Кипарскиот претседател Никос Анастасиадис во неделата забележа дека новата средба во март повеќе ќе биде за зачувување на преговарачкиот импулс отколку за постигнување целосна спогодба.