Зеленски: Разузнавањето потврдува дека Русија подготвува нов масовен напад

Украинскиот претседател Володимир Зеленски во своето вечерно обраќање предупреди дека разузнавачките служби очекуваат нов масовен руски напад врз земјата во следните неколку дена, пренесува ДПА.

Зеленски истакна дека Русија планира да го искористи екстремно студеното време, при што нападите најверојатно ќе вклучуваат дронови со цел исцрпување на противвоздушната одбрана пред ракетните удари. Тој ги повика граѓаните строго да ги почитуваат сирените за воздушна опасност, особено во услови кога температурите паѓаат до двоцифрени вредности под нулата.

Во врска со дипломатските активности, Зеленски информираше за напредок во разговорите со американските претставници, наведувајќи дека повеќето документи за соработка се веќе подготвени за потпишување.

Тој, исто така, изрази големи очекувања од претстојниот Светски економски форум во Давос, кој планира да го искористи за зајакнување на партнерствата и обезбедување средства за обнова на Украина.

Претходно, по нападот со новата суперсонична ракета „Орешник“ во регионот на Лавов и тешките прекини во снабдувањето со струја и вода во Киев, градоначалникот Виталиј Кличко советуваше привремена евакуација на дел од жителите од главниот град.