Завршна обука користење на платформата МВП

Во организација на Центарот за енергетска ефикасност на Македонија и Германското друштво за меѓународна соработка – ГИЗ денеска се одржа последната од осумте обуки за користење на мрежната платформа за следење и потврдување (МВП) на заштедите на енергија и намалување на емисиите на стакленички гасови преку планирање и спроведување на мерки за енергетска ефикасност.

Во првата фаза, оваа платформа овозможува внесување и преглед на информации поврзани со општинските иницијативи, во чии рамки беа опфатени 80 отсто од општините .

Целта на проектот е да се поддржат Министерството за економија и Агенцијата за енергетика во осовременување на методологојата за следење и потврдување на енергетските заштеди од спроведените мерки по методологиијата оодолу-нагоре.

Самир Менедов, национален координатор на Отворениот Регионален фонд за Југоисточна Европа за енергетска ефикасност истакна дека треба да се изработи Прирачник за обука за МВП методологија за претставници на општини, да се надградат локалните човечки капацитети преку обуки, и по обуките да се пружи целосна поддршка во спроведувањето на алатката, како и да се дадат совети за понатамошно развивање на Националниот акциски план за енергетска ефикасност 2019-2021.

Јасминка Димитрова-Капац, раководител на проектот и главен обучувач за спроведување на МВП алатката посочи дека овој проект е од клучно значење за постигнување на зацртаните национални стратешки цели за зголемување на мерките за енергетска ефикасност согласно Стратегијата за развој на енергетиката до 2030 година на Република Северна Македонија, а во хармонија со целите поставени од Европската Комисија и енергетската заедница.

– Имено, до 2030 година земјите-членки на ЕУ се обврзани да ја зголемат енергетската ефикасност од планираните 20 отсто до 2020 година, па нешто повеќе од 30 отсто до 2030 година. Општините преку секторот објекти, транспорт и осветлување, даваат свој придонес кон постигнување на целите, а внесот и систематизацијата на податоците од заштедите претставува клучна појдовна основа, рече Димитрова-Капац.