Македонија
15. January 2020 - 15:56

Занаетчиите од Куманово бараат поголема поддршка

„Занаети во Куманово“ е изложбата на ракотворби што беше отворена денеска во Уметничката галерија во Куманово, а ја организираат Занаетчиската комора, Министертсвото за економија и „Арткрафт“.

Целта е презентирање на занаетите како бренд и симбол на препознатливост на кумановскиот регион.

Присутните имаа можност да видат ракотворби, делови од народни носии, изработки од срма и сувенири со елементи и мотиви од кумановскиот крај.

Според раководителот на Секторот за претприемништво и конкурентност на мали и средни претпријатија во Министерство за економија, Марина Арсовска, и оваа година ќе продолжи поддршката за занаетчиството.

– Оваа 2020 година повторно во рамки на Програмата за претприемништво, конкурентност  и иновации предвидена е поддршка за занаетчиите. Планирани се 6,5 милиони денари и три мерки. Едната е за поддршка на занаетчии за која се проектирани четири милиони денари, втората е за поддршка на занаетчиските комори за проекти за поттикнување и поддршка на занаетчиството и третата е нова мерка од оваа година за чираштвото. Воведуваме субвенционирање на трошоците на занаетчиите за ангажирање чираци, изјави Арсовска.

Лани, Министертвото поддржало 40-тина занаетчии преку јавниот повик за субвенции за набавка на опрема и алат, уредување деловен простор и набавка на софтверски решенија. Во 2019 година поддржани биле и седум занаетчиски комори за проекти што се во насока на поттикнување на занаетчиството, поддршка, креативни занаети, поддршка на промоција на старите занаети и одржување на старите традиции.

Претседателот на Занаетчиска комора, Агрон Фазли изјави дека е потребна дополнителна поддршка за занаетчиите, додека претседателот на Здруежението на уметници и ракотворци „Артикрафт“ од Скопје, Гордана Митровска повика да се промовира занаетчиството како национално богатство и да се поттикнат младите да почнат сопствен бизнис со изработка на сувенири.

Во Куманово се регистирани 400 занаетчии.