Заев најави повлекување на Хоџа од советничкото место

 Џезаир Шаќири, алијас „командант Хоџа“, кој веќе неколку дена се наоѓа во центарот на вниманието на македонската јавност откако стана надворешен соработник на премиерот Зоран Заев за борба против радикализмот, денека во изјава за МИА потврди дека ја напушта оваа функција.

- Причината за тоа лежи во фактот дека медиумите во Македонија кренаа преголема врева за ова назначување. Единствениот политичар во Македонија  што ми укажал некаква шанса е премиерот Зоран Заев и тој единствено ја има мојата почит. Не сакам заради ова Македонија да трпи на својот пат за ЕУ и НАТО. Ако мислеа дека ми е до тие пари, се лажат. Еве им ги назад, не ми се потребни, изјави Шакири за МИА. 

Шаќири беше ангажиран со времен договор на една година со плата од 36.000 денари месечно.

Премиерот Заев денеска од Охрид ја најави оставката на Шаќири: 

-Шакири ми кажа дека денеска ќе соопшти дека ќе се повлече од позицијата поради реакциите во јавноста. Тој вели дека и него му пречат реакциите и ќе се повлече затоа што си ја сака државата – изјави Заев од Охрид каде беше на отворањето на новиот хотел.