За вчерашната сообраќајка кај Удово осомничени две лица

Основното јавно обвинителство – Гевгелија започна постапка против две лица осомничени за вчерашната сообраќајна несреќа во близина на Удово.

Надлежниот обвинител до Основниот суд во Гевгелија достави Предлог за определување мерка-притвор во траење од осум дена за 46-годишниот Д.С., државјанин на Р.Србија, додека за 60-годишниот Ѓ.В., македонски државјанин, се предложени други мерки за претпазливост.

Како што соопшти Јавното обвинителство на РМ, двајцата осомничени се сослушани од страна на надлежен обвинител, а со анализа на доказите треба да се утврди точната одговорност за предизвикување на сообраќајната несреќа.

Несреќата се случи вчера утро на магистралниот пат Демир Капија – Удово, кај месноста Света Петка, кога се судрија автомобил марка „ауди А4“ со германски регистарски таблички, управуван од српскиот државјанин Д.С. (1970), автобус на „Струмица експрес“, управуван од Ѓ.В. (1956) и автомобил марка „фиат сеиченто“ со скопски регистарски таблички, управуван од Н.П. (1975 г.).