WWF: Изумирањето на ајкулите е сигнал за уништување на Средоземното Море

Светската организација за заштита на природата (WWF) денеска објави извештај во кој се наведува дека повеќе од половина видови на ајкули во Средоземното Море се загрозени и предупредува дека тоа е сигнал за уништување на Медитеранот.

– Повеќе од половина видови на ајкули во Средоземното Море се загрозени, а речиси една третина од нив се лови до степен на изумирање. Загрижувачката состојба на морските грабливци е јасен сигнал за целосно уништување на Средоземното Море, чиј див свет е десеткуван поради прекумерниот лов, пишува во извештајот на WWF.

Извештајот под името „Ајкулите во криза: повик на акција за Медитеранот“ е објавен еден ден пред одбележувањето на денот посветен на морските кучиња – 14 јули.

Во него се објаснува дека прекумерното ловење е најголема закана за средоземноморските ајкули, на што влијаат сите видови на риболов, а две медитерански земји се први на листата во ловење морски кучиња: Либија (4.260 тони) и Тунис (4.161 тон).