Втор случај на дете во градинка заразено со Ковид 19, Владата останува на ставот родителите да се вратат на работа

-Со отворањето на установите за згрижување и воспитување деца на 9 септември 2020 година и анализата која покажа дека градинките имаат капацитет да ги згрижат децата согласно Протоколот за активности во установите за згрижување и воспитување на деца, кој на минимум го сведува ризикот од ширење на вирусот КОВИД-19, мерката родителите на децата од 0 до 6 години да бидат надвор од работниот процес ја губи смислата, информираа вчера од Владата во соопштение во кое додаваат дека таа мерка изминатиов период беше во сила затоа што јавните установи за згрижување на деца, односно градинките не работеа.

 

Појаснуваат дека дополнително, во координација со Комисијата за заразни болести донесена е и Одлука за проширување на капацитетите на групите во градинките од 0 до 2 години, на по 12 деца во група, со што јавните установи за згрижување на деца имаат капацитет целосно да ги згрижат децата на мајките кои до сега користеа продолжено породилно отсуство.

Согласно Протоколот, приоритет за згрижување во градинките имаат децата на самохраните родители и децата на двајца вработени родители, со што се исклучува секаква можност децата да останат без соодветна грижа и нега.

Владата потенцира дека внимателно ја следи состојбата на терен и во зависност од потребата ќе носи одлуки што се во интерес на граѓаните и на државата.

Нови 186 позитивни на коронавирус од 1674 тестирања вчера беа регистрирани од Министерството за здравство. Седум починати и 85 оздравени, е билансот од претходното деноноќие.

Вчера беа регистрирани тројца пациенти од Делчево (43,60 и 78г), еден пациент од Куманово (53г), двајца пациенти од Струга (68 и 70г), еден од Гостивар (61г). Сите пациенти се починати во болнички услови.

Вкупната бројка на ковид дијагностицирани во нашата земја од почетокот на епидемијата изнесува 16.274,  бројката на оздравени пациенти е 13.635, на починати е 675, а во моментов бројот на активни случаи во земјата изнесува 1.964. Според завршените епидемиолошки анализи во моментов дистрибуцијата по градови е следна: Скопје активни 564,  Куманово -215, Тетово – 134, Прилеп-119, Штип- 72, Струга – 65,  Битола – 57, Гостивар – 94,  Гевгелија активни 56 (8 лица од ПЕ Гевгелија се жители на Дојран, 14 на Богданци и 12 се странски државјани),  Струмица – 77, Кочани – 76, Делчево – 75 (29 лица од ПЕ Делчево се од Македонска Каменица). Во другите градови активни се под 50 лица.

На Инфективната клиника вкупно се хоспитализирани 75 пациенти. На кислородна поддршка се 43 пациенти, нема пациенти на механичка вентилација.

Во болницата во Козле хоспитализирани  се  3 деца и 3 мајки позитивни на ковид-19, 4 деца и 4 мајки суспектни на вирусот.

Во ГОБ „8 Септември“ вкупно хоспитализирани се 34 пациенти. На респираторна машина се 4 пациенти.

Во болницата во Битола се хоспитализирани 19, а во болницата во Штип се хоспитализирани 44 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица и Струга се хоспитализирани 155, позитивни и сомнителни на Ковид-19.

Во Скопје најмногу активни случаи има во општина  Аеродром – 83,  Центар – 82, Гази Баба – 75, Карпош – 71, Кисела Вода и Чаир по 52, Бутел – 33, Ѓорче Петров – 28, Сарај – 17, Шуто Оризари – 14, Илинден – 12. Во другите општини има помалку од 10.

Под мотото „Безбедни здравствени работници, безбедни пациенти“, вчера беше одбележан 17 септември – Светски ден посветен на безбедноста на пациентите. Светската здравствена организација оваа година акцентот го става и на безбедноста на здравствените работници, кои се во првите борбени редови во справувањето со вирусот КОВИД-19, како еден од најголемите здравствени предизвици со кои се соочува светот.

-Со заштитата на здравствените работници се штитат и пациенти кои се во контакт со нив, истакнуваат од Министерството за здравство.