Врачување на наградите освоени на Литературниот натпревар за млади во Токио

Почесниот конзул на Јапонија во Македонија, Казу Лешниковска денеска ќе им ги врачи наградите на основните училишта „Лазо Трповски“ и „Владо Тасевски“, освоени на Меѓународниот литературен натпревар за млади, што се одржува во Токио, Јапонија.

Двете скопски основни училишта по петти пат успешно учествуваат на овој реномиран меѓународен литературен натпревар што го организираат Организацијата за образование, наука и култура на Обединетите нации УНЕСКО и фондацијата ГОИ од Токио, Јапонија.

Натпреварот е во рамките на одбележувањето на јубилејот 70 години од основањето на УНЕСКО (во кој активно се вклучени 144 земји-членки на УНЕСКО и осум земји-набљудувачи). Покровител на натпреварот е министерот за образование, култура, спорт, наука и технологија на Јапонија.

Меѓу наградените на овој натпревар во својата возрасна категорија е и ученичката Елена Стојкоска од ООУ „Владо Тасевски“.

Со прозни лични творби напишани во форма на есеи на тема „Градиме мир во нашите срца и души“  учествуваа 12.960 учесници од 148 земји.

Личната творба напишана во форма на есеј не смееше да содржи повеќе од 700 зборови и беше напишана на еден од странските јазици што се изучуваат во училиштата (германски или англиски јазик).

Тимовите на основните училишта „Лазо Трповски“ и „Владо Тасевски“ на натпреварот во Токио беа предводени од наставниците Стефан Симовски, предметен наставник по германски јазик и Виолета Панев, предметен наставник по англиски јазик.