Во Виница ќе се воведат мешани патроли за контрола на малолетните лица

Наскоро во Виница ќе профункционираат мешани патроли за контролирање на малолетните лица во текот на вечерните часови, за превентивно да се дејствува во намалувањето на девијантните однесувања и нарушувањето на јавниот ред и мир.

Ова е една од активностите што беше договорена на работната средба во локалната самоуправа меѓу градоначалникот Ивица Димитров и неговите соработници со претставници од СВР – Штип и од Полициската станица – Виница, а за што повод беше актуелната безбедносна состојба во општината.

– Во функција ќе биде ставен новоформираниот Локален совет за превенција што треба да помогне во детектирањето на сите пропусти и проблеми во делот на безбедноста, посебно меѓу младите и малолетните лица. Ќе воведеме мешани патроли, во кои освен полициски службеници ќе има и претставници од локалната самоуправа и од советите на родители во училиштата. Ќе организираме состаноци со членови на урбаните и месните заедници, а пред почетокот на учебната година ќе се одржат средби со учениците во основно и средно образование со кои ќе се разговара за подобрување на сообраќајната култура и нивната безбедност при доаѓање и заминување од училиште, истакна градоначалникот Димитров.

Локалниот совет за превенција во Виница ќе почне со работа кон крајот на идниот месец, за што веќе е изготвен и план за работа, а на состанокот во општината, претставниците од СВР – Штип апелираа за активно преземање мерки за подобрување на безбедноста на улиците во градот и населените места.

Поради зголемената фреквенција на возила и други учесници во сообраќајот, како и евидентираниот пораст на прекршоци на законските прописи, препорачано беше во наредниот период да се преземат засилени теренски контроли со изрекување соодветни санкции кон прекршителите.