Во Велес се обновува уништената урбана опрема

Во паркот пред ООУ „Васил Главинов“ во новиот дел на Велес  екипи на ЈКП „Дервен“ започнаа со замена на уништената урбана опрема со нова.

 

Како што информира градоначалникот Славчо Чадиев во изминатиот период оваа локација често беше мета на оштетување од страна несовесни поединци. 

 

- Апелираме до Вас почитувани сограѓани, чувајте го она што е создадено. Нека остане наша гордост. Наместо за поправка на урбаната опрема нека останат средства за нов парк, за ново катче за игра и одмор, истакна Чадиев.

 

Тој најави дека оваа пролет целосно ќе биде обновена урбаната опрема и во другите паркови и јавни површини во Велес.

 

Инаку, Општина Велес во 2014 година  само за обновување на уништената урбана опрема од општинскиот буџет потроши 15 илјади евра, а слична парична сума беше издвоена за оваа намена и минатата година.