Во Собранието пристигна предлогот за разрешување на Коцевски

Во Собранието денеска пристигна Предлогот за разрешување на републичкиот јавен обвинител Љупчо Коцевски.

За натамошната процедура, од Собранието најавуваат дека ќе информираат дополнително. 

Постапката за разрешување на Коцевски, која беше запрена по трагедијата во Кочани, а привремено стопирана во изборниот период, продолжи со одлука донесена од страна на Владата.
 
Владата на завчерашната седница го усвои предлогот за разрешување на државниот јавен обвинител Љупчо Коцевски и најави дека ќе го достави до Собранието за натамошна постапка. Со ова Владата ја продолжува постапката што претходно беше поведена, но поради законски ограничувања за време на изборниот период беше привремено стопирана.

- Врз основа на членот 88 став 1 од Законот за јавното обвинителство, а по претходно добиено мислење од страна на Советот за јавни обвинители му предлага на Собранието од функцијата јавен обвинител на Република Македонија да го разреши Љупчо Коцевски, поради направени крупни професионални грешки при раководењето со Јавното обвинителство што доведува до нарушување на ефикасноста и функционалноста на Јавното обвинителство, рече портпаролката Марија Митева во образложението за усвојувањето на предлогот.

Митева нагласи дека разрешувањето се предлага поради направени крупни професионални грешки при раководењето со Јавното обвинителство, што, како што рече, доведува до нарушување на ефикасноста и функционалноста на ЈО. Според неа, неовластеното изнесување информации, податоци за судски предмети, со што е повредена обврската за тајност на постапката согласно закон, нарушување на угледот на Јавното обвинителство и неговиот личен углед, непостапувањето согласно обврските предвидени со Уставот, законите и меѓународните договори ратификувани во согласност со Уставот, се  повреди што, исто така, ги направил Коцевски. Како последица на сторените повреди, во изминатиот период е „евидентна нарушената функционалност на Јавното обвинителство и сериозно е нарушен интегритетот на институцијата“.  

Владата, претходно на 11 февруари годинава донесе одлука да поведе постапка за разрешување на Коцевски. Но, само еден месец подоцна, таа постапка беше запрена по пожарот во нелегалната дискотека „Пулс“ во Кочани. 

Потоа на 26 јуни пратеничката група на Левица поднесе интерпелација за државниот јавен обвинител, како што наведоа „поради нефункционална состојба во обвинителството, неажурност во постапувањето и надворешни политички влијанија врз неговата работа". На 29 јули пратениците во Собранието со 71 глас „за“ изгласаа интерпелација на државниот јавен обвинител. Постапката за разрешување на Коцевски, потоа беше запрена поради „законските ограничувања во предизборниот период“.

Премиерот Христијан Мицкоски вчера изјави дека очекува брзо да се одвива целата процедура на избор на нов главен јавен обвинител на местото на Коцевски. За негативното мислење од страна на Советот за јавни обвинители по однос предлогот за разрешување на Коцевски, премиерот рече дека тоа е став на тоа тело, односно дека Владата има поинакво мислење.

Љупчо Коцевски за републички јавен обвинител беше именуван во Собранието 13 февруари 2024 година. 

МИА