Во Словенија и Хрватска издадени предупредувања за невреме

Обилни врнежи се очекуваат во Словенија, а дождот и невремето кои прво ќе ги зафатат западните и централните делови на соседната земја се знак за влошување на времето и во Хрватска. Словенечката агенција за животна средина издаде портокалово предупредување за западна и централна Словенија, каде се очекуваат меѓу 40 и 80, локално и до 100 милиметри дожд.

Метеоролозите предупредуваат дека реката Випава може да почне да се излева во следните неколку часа, додека поплавите во чувствителните области би можеле да ескалираат во вечерните часови и ноќта кон сабота.

„Денеска и утре можни се излевања и на други реки и нагло да се подигнат поројни водотеци во западна, централна и јужна Словенија“, предупредува Агенцијата.

Заедно со обилните врнежи, во Приморска и Нотрањска дува и силен јужен ветер, а во алпските долини на Горењска може да има снег.

Покрај поплавите, зголемен е и ризикот од лизгање на земјиштето и поради натопената почва. Геолошкиот завод на Словенија предупредува дека особено чувствителни подрачја се западните и централните делови на земјата, но лизгање на земјиштето може да има и во други региони.

Во Хрватска денеска и утре ќе има обилни врнежи, а дожд и силен ветер веќе зафатија делови од земјата.

Државниот хидрометеоролошки завод издаде предупредување за денеска и сабота. Метеоролозите од Хрватската метеоролошка агенција предупредуваат на обилни врнежи и можност од поплави во делови од земјата. Поради обилни врнежи постои можност за нагло зголемување на водостојот кај помалите реки и потоци, што може да доведе до поплави, се наведува во предупредувањето на Државниот хидрометеоролошки завод.