Во Крива Паланка се одржа манифестацијата „Краиште 2015“

По повод христијанскиот празник Петровден денеска на месноста Голеш, кај селото Голема Црцорија, на тромеѓето меѓу Македонија, Србија и Бугарија се одржа трилатералната традиционална меѓународна средба „Краиште 2015“.

Манифестацијата е во организација на општините Крива Паланка, Босилеград и Ќустендил. Во рамки на маниефстацијата традиционално беше организирана културно-уметничка програма со настапи на повеќе фолклорни друштва и ансамбли од трите општини, а општина Крива Паланка се претстави со членовите на КУД „8 Октомври“.

На средбата присуствуваа градоначалниците на општина Босилеград, Владимир Захариев, на Крива Паланка, Арсенчо Алексовски и претставник од локалната самоуправа на општина Ќустендил.

- Традицијата на одржување вакви средби има посебно значење за зближувањето на народите од трите страни на граничните линии, кои како да се бришат во рамките на оние 12 часа денес од 8 до 20 часот кога преминот е отворен за сите граѓани и може да се минува само со лична карта или патна исправа. Секоја година на овој ден се среќаваме со нашите пријатели до Србија и Бугарија, а граѓаните кои доаѓаат и од граничните општини, но и од разни краеви на своите земји имаат можност да се видат со своите роднини и пријатели, изјави градоначалникот Алексовски.

Тој потенцира дека денешната манифестација е со најмасовна посетеност досега, со над 3.000 граѓани, а најави дека ќе продолжи да се организира и во иднина.