Во Кавадарци одбележан Европскиот ден на борба против трговијата со луѓе

„Спречување на трговијата со луѓе” беше насловена трибина што денеска се одржа во Кавадарци посветена на борбата против трговијата со луѓе, во организација на Општинската организација на Црвениот крст и полициската станица од општа надлежност од овој град. 

- Целна група ни беа ученици од осмо и деветто одделение од сите основни училишта. Младите ја проследија презентацијата на оваа тема. Имаа можност да видат и одредени видео клипови за нивни врсници кои во различни делови од светот, паднале во рацете на трговците со луѓе, рече Димитар Каракулев, инспектор за превенција.

Каракулев нагласувајќи оти трговијата со луѓе е еден од најголемите видови организиран криминал во светот, информира дека во светски рамки, на годишно ниво, некаде околу 2.5 милиони луѓе се жртви на ваква трговија, а околу половина од нив се деца.

- Токму затоа и наша целна група беа овие деца. Тие се запознаа со поимот трговија со луѓе, кои се причините поради кои децата можат да се најдат во канџите на трговците со луѓе и како превентивно да се влијае за да се заштитат од нив, додаде инспекторот.