Во израелските воздушни напади врз Бејрут загинаа најмалку 22 лица

Бројот на загинатите во вчерашните два израелски воздушни напади врз Бејрут се искачи на 22, а 117 луѓе се повредени, соопшти Министерството за здравство на Либан.

Израелската авијација третпат за дваесетина дена ги напаѓа јужните предградија на Бејрут, каде што се наоѓа упориштето на Хезболах.

Тоа е најсмртоносен напад откако Израел на 23 септември почнаа нападите врз либанското проиранско движење Хезболах. Оттогаш во нападите на израелската армија (ИДФ)  ширум Либан убиени се повеќе од 1.200 луѓе, а еден милиони беа принудени да ги напуштат своите домови.

Едниот напад беше во областа Рас ал Наба, а другиот во квартот Бурџ Аби Хаидар. Либанското Министерство за здравство соопшти и дека при еден од израелските напади во Бејрут урната е зграда.

Според неименувани либански безбедносни извори мета на синоќешните израелски напади бил Вафик Сафа, кој ја предводи единицата за врски и координација на Хезболах одговорна за соработка со либанските безбедносни агенции. Сафа го преживеа нападот.

Обидот за елиминација на Сафа значи дека ИДФ ги прошири целите, бидејќи претходно беше фокусирана на воените команданти и највисоките лидери на Хезболах.

Израел повторно ги интензивира и воздушните и копнените операции во Појасот Газа. Палестинската Црвена полумесечина вчера соопшти дека во нападот врз училиштето Рафида во Деир ел-Балах во центарот на Појасот Газа, во кое се засолнуваат раселените семејства, загинаа 28 лица, а 54 се повредени.

Израелската армија тврди дека користи „прецизни воздушни напади врз терористите кои дејствуваат во згради, што претходно биле користени како училишта“.