Во Гевгелија лани решени 1.383 барања за легализација на дивоградби

Од поднесените 2.100 барања за легализација на бесправно изградени објекти во Гевгелија лани се  решени 1.383, што претставува повеќе од 70 отсто, информира денеска  раководителот на гевгелискиот општински сектор за урбанизам Панче Киров.

Причина за нерешените барања, посочи Киров, се недоставени елаборати од страна на подносителите, а во одредени случаи и поради неплатени комунални такси, рече раководителот на секторот Панче Киров. 

Според него, Секторот за урбанизам на општина Гевгелија ја зголемил ефикасноста во работата во минатата година и го намалил рокот за чекање благодаренио на примената на издавање урбанистички документи по електронски пат.

Од останатите барања кои пристигнале во Секторот за урбанизам, во законски одредениот рок од 79 барања за одобрение за градба биле решени дури 76, а од 38 барања за поставување урбана опрема се решени 32, потенцира Киров и додаде дека успешно биле решени сите поднесени барања за извод од урбанистички план.