Во Драч уапсени двајца припадници на криминалната група „Беланоца“

Во заедничка акција на Македонската полиција, Американската ДСС и безбедносните органи на Албанија, спроведена во Драч, Албанија, уапсени се двајца припадници на организираната криминална група „Беланоца“, соопшти Министерството за внатрешни работи.

Станува збор за М.Џ. (26) од Скопје и С.Н. (34), роден во Норвешка, за кои Интерпол имал распишано меѓународни потерници поради сомнение за повеќе тешки кривични дела, меѓу кои убиство, убиство во обид, тешка телесна повреда, недозволено изработување, држење и тргување со оружје или распрскувачки материи, како и злосторничко здружување.

Според информациите од МВР, акцијата била реализирана врз основа на разузнавачки информации обезбедени од Македонската полиција, во соработка со Американската дипломатска безбедносна служба (ДСС) и безбедносните органи на Албанија.

При приведувањето, кај двајцата биле пронајдени фалсификувани лични документи, за кои постои сомнение дека ги користеле за да ја напуштат Македонија и да ја избегнат правдата.

Од МВР посочуваат дека оваа акција е резултат на повеќемесечна меѓународна соработка меѓу македонските, американските и албанските безбедносни служби.