Во Битола се одржа работилница за инклузија на малите деца

Центарот за човекови права „АМОС“-Битола во соработка со Првата детска амбасада во светот „Меѓаши“-Скопје, денеска во Битола одржаа работилница на тема „Подобрување на почитувањето на различностите и инклузијата на малите деца преку активности за градење на мир“.

Според Сашо Кочанковски, претседател на „АМОС“-Битола насилството кон децата претставува кршење на нивните права и претставува сигурна прогноза за преживување насилство и во подоцнежните години од животот, било да е тоа во улога на жртва или пак во улога на насилник.

- Во работилницата ги вклучивме лицата што најмногу влијаат врз децата во периодот на раниот детски развој, а тоа се воспитувачите, менаџерите на детските градинки од двата сектора, институции што вршат образование на деца со посебни потреби, студенти и други субјекти што ќе може да ја имплементираат програмата. Една од активностите е работа со децата низ игра со кукли, учење за мирот, почитувањето, недискриминација, надминување на стереотипите и други теми, истакна Кочанковски.

Реализацијата на проектот се врши со партнерски организации од повеќе држави односно „Помош за децата“-Белград, Центар за цивилна иницијатива-Загреб, „Партнери за деца“-Тирана, „Балкански сончогледи“-Приштина, „Децата пред се“-Подгорица и „Раните години“-Белфаст, Ирска.

- Во функција на проектот е изработен прирачник, превод од ист прирачник што го изработија „Раните години“ од Белфаст. Во наредниот период ќе се врши вмрежување со што поефикасно ќе се разменуваат домашните и странски искуства. Можноста да се врши влијание врз децата од рана возраст со посебен метод и приоди, поефикасно ќе се учат како да бидат правични, активни, слободно да се изразуваат и да придонесуваат во заедницата, посочи Кочанковски.