Македонија
1. August 2016 - 14:53

Во Берово поставена спомен плоча за македонските бранители

На влезот на спортската сала во Берово која го носи името „Македонски бранители“, денеска беше поставена спомен-плоча на која се испишани имињата на четворицата бранители од Берово кои во конфликтот во 2001 година го изгубија својот живот, Љупчо Мирчовски, Димитар Двојаковски, Зоран Бубевски и Никола Пехчевски.
 
Спомен-плочата ја откри градоначалникот на Општина Берово, Драги Наџински, кој истакна дека нивното дело никогаш нема да се заборави во Берово.
 
-Почитта кон нив останува засекогаш, а преку оваа спомен-плоча нивното дело останува вечно, а нивните имиња остануваат вечно испишани во македонската историја и борба, рече Наџински.
 
На свеченоста присуствуваа поголем број гости, како и роднини и пријатели  на бранителите, а на спомен-плочата  свежо цвеќе положија делегација од Општина Берово, Советот на Општина Берово и претставници од политички партии и здруженија на граѓани.