ВМРО-ДПМНЕ: Владата на СДСМ да почне да работи во интерес на граѓаните

Владата на СДСМ треба да почне да работи и да ги исполнува ветувањата што им ги даде на граѓаните, а не да си поигрува и да ги потценува. За овие месец дена единствено што и успева на оваа Влада е полнење на државните институции со членови на СДС и некомпетентни и неискусни кадри на Сорос, сметаат од ВМРО-ДПМНЕ.

СДС и Заев, сметаат од партијата, единствено што знаат и умеат е деструкција, криза и евтин политички популизам од кои нема полза ниту државата, ниту граѓаните.

- Владата на СДС си поигрува и ги потценува граѓаните наместо да работи на исполнување на ветувањата. СДС ветуваше раст на економијата од 5 до 7% на годишно ниво, но владата на Зоран Заев сега смета дека може да оствари раст од само 2,2% или 0,8% процентни поени помалку од растот што го проектираше ВМРО-ДПМНЕ. Тоа се цели 25% помалку. За да се оствари растот треба работа, визија и знаење, а не блокади, укинувања и најави за уривање, се вели во денешното соопштение од ВМРО-ДПМНЕ.

Оттаму потсетуваат и дека „СДС најавувал зголемување на капиталните инвестиции, а сега Владата на Зоран Заев со предложениот ребаланс истите ги скрати за 3 милијарди денари“. Тоа, посочуваат од ВМРО-ДПМНЕ, се цели 50 милиони евра помалку за капитални инвестиции од проекциите кои ги имала владата на ВМРО-ДПМНЕ.

- Со ова се потврдува дека владата на СДС не е реформска, туку антиреформска. СДС треба да се фатат за работа, бидејќи граѓаните очекуваат исполнување на ветувањата за минимална плата од 16.000 денари и просечна од 30.000 денари. Пензионерите очекуваат повисоки пензии, а докторите плати од 100.000 денари, се вели во соопштението од ВМРО-ДПМНЕ.