Владата пак се предомисли - Нема повисоко ДДВ за витамините

По бурните реакции во јавноста, се враќаат старите цени во аптеките. Витамините, суплементите, додатоците за исхрана за раст и развој на децата, мултивитаминските препарати кои содржат витамини Б, Д и Е, магнезиум, пробиотиците, кои требаше да се даночат со 10, се враќаат на 5%, велат од фармацевтската комора за Сител.

Од комората велат дека согласно одлуката, 10% ДДВ ќе има само кај два вида таблети за џвакање со вкус на јагода и портокал.

Додаваат дека чаевите со 18% ДДВ остануваат на 18.

Од денеска со 5% повторно се продаваат урдата, замрзнатото тесто, црниот бибер, црвениот пипер,  бебешките каши,  адаптираното млеко за доенчиња, хербалните чаеви,  наполитанките, вафлите, растителниот кашкавал,  останати одредени видови кашкавали, лутеница, конзервираното цвекло и  феферони.

Овие продукти се најдоа на листата со илјадници други чие ДДВ скокна од 5 на 10% со образложение дека се луксузни или пак, дека не се здрави.

„Лускузни“ остануваат: чипсот, мајонезот, сите видови апетисани, компоти, тропското овошје, сончогледот, мастиките, најголем дел од зачините и уште стотици други производи.

Првиот човек на пазарниот инспекторат уверува дека зголемени цени на основните продукти нема да има.

„ДДВ-то од 5% си останува на основните прехранбени производи и покачување на цените нема да има. И не смее да има. Трговците може дополнително да ги намалат цените на основните прехранбени производи, но во ниту еден случај да ги зголемат. Пазарниот инспекторат постојано врши надзори и можам да кажам дека трговците генерално се придржуваат до одлуките на Владата“ – Горан Трајковски, директор на ДПИ

Цигарите, за кои имаше информација дека треба да поскапат од денеска, ќе имаат нови цени од јануари, кога една кутија ќе се продава пет денари поскапо.

Во вторник, пак, на владина седница ќе се разгледува предлог-одлуката за зголемени давачки при увоз на возила. Според планот, повисока даночна стапка ќе имаат луксузните и возилата кои повеќе загадуваат.