Свет
3. April 2018 - 14:58

Велика Британија бара „сразмерен начин“ да одговори на заканите на Русија

Велика Британија бара „сразмерен начин“ да одговори на заканата од Русија, изјави денеска портпаролот на премиерката Тереза Меј, откако пензионирано официјално лице на руската војска наведе дека труењето на поранешниот двоен шпион Сергеј Скрипал може да предизвика нова светска војна. 

- Мораме да одговориме на пропорционален начин на ваквото агресивно однесување на руската страна, и тоа го правиме, изјави портпаролот на премиерката Меј на прашањето дали постои ризик од предизвикување војна.

Британските медиуми претходно денеска пренесоа дека Евгениј Бужински, генерал во пензија, изјавил оти последиците од нападот во Солзбери може да предизвика „нова војна во историјата на човештвото“.

Инаку, Велика Британија ја обвинува Русија за нападот со нервен агенс на поранешниот двоен шпион Скрипал и неговата ќерка Јулија во англискиот град Солзбери, поради што протера 23 руски дипломати, додека Москва негира дека е вмешана во нападот. Русија на Лондон му врати со иста мерка, протерувајќи британски дипломати.