Утре продолжува расправата за Предлог-буџетот за 2018

Седницата на собраниската Комисија за финансирање и буџет на која се расправа за Предлог-буџетот за 2018 година ќе продолжи утре.

Со седницата претседава пратеникот од СДСМ Васко Ковачевски кој беше овластен од претседателот на Собранието Талат Џафери откако претседателката на Комисијата Лилјана Кузмановска од ВМРО-ДПМНЕ повторно го одложи закажаното продолжение.

Општиот претрес не го следат пратениците од ВМРО-ДПМНЕ.

Комисијата за финансирање и буџет ја почна расправата по Предлог-буџетот за 2018 година на 27 ноември. Оттогаш беа закажани неколку продолженија, но не се одржаа. Кузмановска ја одложува седницата на Комисијата за Буџетот по акцијата за приведување на пратениците од нејзината пратеничка група поради случувањата во Собранието на 27 април.

Според Деловникот, расправата по Предлог-буџетот во Комисијата трае 10 работни денови по што предлогот се става на пленарна седница каде се расправа пет работни денови.

За предложениот текст се поднесени 279 амандмани.